ਜਵਾਈ ਹੋਵੇ ਤਾਂ ਅਜਿਹਾ! ਦਾਜ ਦੇ 31 ਲੱਖ ਵਾਪਸ ਕਰ ਸ਼ਗਨ ‘ਚ ਲਿਆ ਸਿਰਫ਼ 1 ਰੁਪਇਆ, ਜਿੱਤਿਆ ਦਿਲ

ਆਗਰਾ : ਉੱਤਰ ਪ੍ਰਦੇਸ਼ ਦੇ ਆਗਰਾ ਜ਼ਿਲ੍ਹੇ ਵਿੱਚ ਇੱਕ ਦਿਲ ਨੂੰ ਛੂਹ ਲੈਣ ਵਾਲੀ ਅਤੇ ਪ੍ਰੇਰਨਾਦਾਇਕ ਘਟਨਾ ਸਾਹਮਣੇ ਆਈ ਹੈ। ਮੁਜ਼ੱਫਰਨਗਰ ਦੇ ਇੱਕ 26 ਸਾਲਾ ਵਿਅਕਤੀ ਅਵਧੇਸ਼ ਰਾਣਾ ਨੇ ਆਪਣੇ ਵਿਆਹ ਵਿੱਚ 31 ਲੱਖ ਰੁਪਏ ਦੇ ਮਿਲੇ ਦਾਜ ਨੂੰ ਠੁਕਰਾ ਦਿੱਤਾ ਅਤੇ ਸਿਰਫ਼ ₹1 ਰੁਪਏ ਸ਼ਗਨ (ਤੋਹਫ਼ੇ) ਵਜੋਂ ਸਵੀਕਾਰ ਕੀਤੇ। ਲਾੜੇ ਦੇ ਇਸ ਫੈਸਲੇ ਨੇ ਮੌਜੂਦ ਸਾਰੇ ਮਹਿਮਾਨਾਂ ਦਾ ਦਿਲ ਜਿੱਤ ਲਿਆ। ਲਾੜੀ ਅਦਿਤੀ ਸਿੰਘ (24) ਨੇ ਆਪਣੀ ਐਮਐਸਸੀ ਦੀ ਪੜ੍ਹਾਈ ਪੂਰੀ ਕਰ ਲਈ ਹੈ। ਉਸਦੇ ਪਿਤਾ ਦਾ ਕੋਵਿਡ-19 ਮਹਾਂਮਾਰੀ ਦੌਰਾਨ ਦੇਹਾਂਤ ਹੋ ਗਿਆ ਸੀ। ਦੱਸ ਦੇਈਏ ਕਿ ਵਿਆਹ ਦੇ ਮੌਕੇ ਲਾੜੀ ਦੇ ਪਰਿਵਾਰ ਨੇ ‘ਤਿਲਕ’ ਸਮਾਰੋਹ ਲਈ ਇੱਕ ਥਾਲੀ ‘ਤੇ ₹31 ਲੱਖ ਰੁਪਏ ਦੀ ਰਕਮ ਸਜਾਈ ਸੀ। ਪਰ ਲਾੜੇ ਅਵਧੇਸ਼ ਰਾਣਾ ਨੇ ਇਸਨੂੰ ਸਵੀਕਾਰ ਕਰਨ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ ਅਤੇ ਕਿਹਾ ਕਿ ਮੈਨੂੰ ਇਸਨੂੰ ਲੈਣ ਦਾ ਕੋਈ ਅਧਿਕਾਰ ਨਹੀਂ ਹੈ। ਇਹ ਲਾੜੀ ਦੇ ਪਿਤਾ ਦੀ ਮਿਹਨਤ ਦੀ ਕਮਾਈ ਹੈ, ਮੈਂ ਇਸਨੂੰ ਸਵੀਕਾਰ ਨਹੀਂ ਕਰ ਸਕਦਾ। ਲਾੜੇ ਦੇ ਮਾਪਿਆਂ ਨੇ ਉਸਦੇ ਫੈਸਲੇ ਦਾ ਪੂਰਾ ਸਮਰਥਨ ਕੀਤਾ। ਲਾੜੀ ਦੇ ਪਰਿਵਾਰ ਨੇ ਇਸ ਲਈ ਲਾੜੇ ਦਾ ਦਿਲੋਂ ਧੰਨਵਾਦ ਕੀਤਾ। ਵਿਆਹ ਵਿੱਚ ਮੌਜੂਦ ਲੋਕ ਲਾੜੇ ਦੇ ਨੇਕ ਇਰਾਦਿਆਂ ਅਤੇ ਇਮਾਨਦਾਰੀ ਦੀ ਪ੍ਰਸ਼ੰਸਾ ਕਰ ਰਹੇ ਹਨ।