ਵੈੱਬ : ਪਾਕਿਸਤਾਨ ਤੇ ਈਰਾਨ ਤੋਂ 3,500 ਤੋਂ ਵੱਧ ਅਫ਼ਗਾਨ ਸ਼ਰਨਾਰਥੀਆਂ ਨੂੰ ਵਾਪਸ ਅਫ਼ਗਾਨਿਸਤਾਨ ਭੇਜ ਦਿੱਤਾ ਗਿਆ ਹੈ। ਤਾਲਿਬਾਨ ਦੇ ਉਪ ਬੁਲਾਰੇ ਮੁੱਲਾ ਹਮਦੁੱਲਾ ਫਿਤਰਤ ਨੇ ਦੱਸਿਆ ਕਿ ਕੁੱਲ 745 ਪਰਿਵਾਰ, ਜਿਨ੍ਹਾਂ ਵਿੱਚ 3,513 ਵਿਅਕਤੀ ਸ਼ਾਮਲ ਸਨ, ਵੱਖ-ਵੱਖ ਸਰਹੱਦੀ ਰਸਤਿਆਂ ਰਾਹੀਂ ਆਪਣੇ ਦੇਸ਼ ਪਰਤੇ ਹਨ। ਇਨ੍ਹਾਂ ਰਸਤਿਆਂ ‘ਚ ਹੇਰਾਤ ਦਾ ਇਸਲਾਮ ਕਲਾ, ਨਿਮਰੋਜ਼ ਦਾ ਪੁਲ-ਏ-ਅਬਰੇਸ਼ਮ, ਕੰਧਾਰ ਦਾ ਸਪਿਨ ਬੋਲਡਕ, ਹੇਲਮੰਦ ਦਾ ਬਹਰਾਮਚਾ ਅਤੇ ਨੰਗਰਹਾਰ ਦਾ ਤੋਰਖਮ ਸ਼ਾਮਲ ਹਨ। ਇਸ ਤੋਂ ਇੱਕ ਦਿਨ ਪਹਿਲਾਂ, ਯਾਨੀ ਮੰਗਲਵਾਰ ਨੂੰ ਵੀ 3,610 ਅਫ਼ਗਾਨ ਸ਼ਰਨਾਰਥੀਆਂ ਨੂੰ ਡਿਪੋਰਟ ਕੀਤਾ ਗਿਆ ਸੀ।
ਸ਼ਰਨਾਰਥੀਆਂ ਦੀ ਸਹਾਇਤਾ ਅਤੇ ਮੁੜ ਵਸੇਬੇ ਦੇ ਕੀਤੇ ਗਏ ਪ੍ਰਬੰਧ
ਰਿਪੋਰਟ ਮੁਤਾਬਕ, ਵਾਪਸ ਆਉਣ ਵਾਲੇ 627 ਪਰਿਵਾਰਾਂ ਨੂੰ ਉਨ੍ਹਾਂ ਦੇ ਸਬੰਧਤ ਖੇਤਰਾਂ ਵਿੱਚ ਪਹੁੰਚਾਇਆ ਗਿਆ ਹੈ। ਅਫ਼ਗਾਨਿਸਤਾਨ ਪਹੁੰਚਣ ‘ਤੇ 660 ਪਰਿਵਾਰਾਂ ਨੂੰ ਮਨੁੱਖੀ ਸਹਾਇਤਾ ਪ੍ਰਦਾਨ ਕੀਤੀ ਗਈ ਅਤੇ ਦੂਰਸੰਚਾਰ ਕੰਪਨੀਆਂ ਵੱਲੋਂ ਸ਼ਰਨਾਰਥੀਆਂ ਨੂੰ 714 ਸਿਮ ਕਾਰਡ ਵੀ ਵੰਡੇ ਗਏ ਤਾਂ ਜੋ ਉਹ ਸੰਪਰਕ ਸਥਾਪਤ ਕਰ ਸਕਣ।
ਪਾਕਿਸਤਾਨ ‘ਚ ਮਨੁੱਖੀ ਅਧਿਕਾਰਾਂ ਦੀ ਉਲੰਘਣਾ ਤੇ ਪੁਲਸ ਦਾ ਕਥਿਤ ਤਸ਼ੱਦਦ
ਪਾਕਿਸਤਾਨ ‘ਚ ਰਹਿ ਰਹੇ ਅਫ਼ਗਾਨ ਸ਼ਰਨਾਰਥੀਆਂ ਨੇ ਉੱਥੋਂ ਦੀ ਪੁਲਸ ‘ਤੇ ਗੰਭੀਰ ਦੋਸ਼ ਲਾਏ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਪੁਲਸ ਵੱਲੋਂ ਉਨ੍ਹਾਂ ‘ਤੇ ਲਗਾਤਾਰ ਦਬਾਅ ਪਾਇਆ ਜਾ ਰਿਹਾ ਹੈ ਤੇ ਗ੍ਰਿਫਤਾਰੀਆਂ ਰਾਹੀਂ ਉਨ੍ਹਾਂ ਦੀ ਮਜ਼ਬੂਰੀ ਦਾ ਫਾਇਦਾ ਉਠਾ ਕੇ ਪੈਸੇ ਕਮਾਏ ਜਾ ਰਹੇ ਹਨ। ਅਫ਼ਗਾਨ ਅਖ਼ਬਾਰ ‘8 AM ਮੀਡੀਆ’ ਅਨੁਸਾਰ, ਸ਼ਰਨਾਰਥੀ ਬੁਨਿਆਦੀ ਮਨੁੱਖੀ ਅਧਿਕਾਰਾਂ ਤੋਂ ਵਾਂਝੇ ਹਨ ਅਤੇ ਡਰ ਤੇ ਚਿੰਤਾ ਦੇ ਮਾਹੌਲ ਵਿੱਚ ਜੀਅ ਰਹੇ ਹਨ। ਰਿਪੋਰਟਾਂ ਵਿੱਚ ਇਹ ਵੀ ਸਾਹਮਣੇ ਆਇਆ ਹੈ ਕਿ ਪਾਕਿਸਤਾਨੀ ਸੁਰੱਖਿਆ ਬਲ ਇਸਲਾਮਾਬਾਦ ਸਮੇਤ ਵੱਖ-ਵੱਖ ਇਲਾਕਿਆਂ ਵਿੱਚ ਸ਼ਰਨਾਰਥੀਆਂ ਨੂੰ ਪ੍ਰੇਸ਼ਾਨ ਕਰ ਰਹੇ ਹਨ ਅਤੇ ਸਾਦੇ ਕੱਪੜਿਆਂ ‘ਚ ਮੌਜੂਦ ਲੋਕ ਸ਼ਰਨਾਰਥੀਆਂ ਤੋਂ ਪੈਸੇ ਦੀ ਵਸੂਲੀ ਕਰ ਰਹੇ ਹਨ। ਮਨੁੱਖੀ ਅਧਿਕਾਰ ਸੰਗਠਨਾਂ ਨੇ ਇਸ ਅਨਿਸ਼ਚਿਤਤਾ ਅਤੇ ਸਰਕਾਰ ਵੱਲੋਂ ਸ਼ਰਨਾਰਥੀਆਂ ਦੀ ਸੁਰੱਖਿਆ ਦੇ ਵਾਅਦਿਆਂ ਨੂੰ ਪੂਰਾ ਨਾ ਕਰਨ ‘ਤੇ ਚੁੱਪੀ ਧਾਰੀ ਹੋਈ ਹੈ।