ਕੈਲੀਫੋਰਨੀਆ : ਭੂਚਾਲ ਦੇ ਤੇਜ਼ ਝਟਕਿਆਂ ਨਾਲ ਸਾਰਾ ਅਮਰੀਕਾ ਕੰਬ ਗਿਆ। ਅਮਰੀਕਾ ਦੇ ਉੱਤਰੀ ਕੈਲੀਫੋਰਨੀਆ ‘ਚ ਵੀਰਵਾਰ ਨੂੰ 7.0 ਤੀਬਰਤਾ ਦੇ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ। ਭੂਚਾਲ ਦੇ ਝਟਕੇ ਇੰਨੇ ਜ਼ਬਰਦਸਤ ਸਨ ਕਿ ਕਰਿਆਨੇ ਦੀ ਦੁਕਾਨ ‘ਚ ਰੱਖਿਆ ਸਾਮਾਨ ਡਿੱਗ ਗਿਆ। ਕਾਹਲੀ ਵਿੱਚ ਬੱਚਿਆਂ ਨੂੰ ਸਕੂਲਾਂ ਵਿੱਚ ਮੇਜ਼ਾਂ ਥੱਲੇ ਲਕੋ ਲਿਆ ਗਿਆ। ਅਮਰੀਕੀ ਪੱਛਮੀ ਤੱਟ ‘ਤੇ ਰਹਿਣ ਵਾਲੇ 53 ਲੱਖ ਲੋਕਾਂ ਲਈ ਸੁਨਾਮੀ ਦੀ ਚਿਤਾਵਨੀ ਵੀ ਜਾਰੀ ਕਰਨੀ ਪਈ।
ਯੂਐੱਸ ਭੂ-ਵਿਗਿਆਨਕ ਸਰਵੇਖਣ ਨੇ ਕਿਹਾ ਕਿ ਭੂਚਾਲ ਸਥਾਨਕ ਸਮੇਂ ਅਨੁਸਾਰ ਸਵੇਰੇ 10:44 ਵਜੇ ਫਰਨਡੇਲ ਸ਼ਹਿਰ ਦੇ ਪੱਛਮ ‘ਚ ਆਇਆ। ਫਰੈਂਡੇਲ ਹਮਬੋਲਟ ਕਾਉਂਟੀ ਦਾ ਇੱਕ ਛੋਟਾ ਜਿਹਾ ਸ਼ਹਿਰ ਹੈ। ਇਹ ਸਥਾਨ ਓਰੇਗਨ ਬਾਰਡਰ ਤੋਂ 209 ਕਿਲੋਮੀਟਰ ਦੂਰ ਹੈ।
ਭੂਚਾਲ ਦੇ ਝਟਕੇ ਦੱਖਣੀ ਸਾਨ ਫਰਾਂਸਿਸਕੋ ਤੱਕ ਮਹਿਸੂਸ ਕੀਤੇ ਗਏ। ਸਾਨ ਫਰਾਂਸਿਸਕੋ ਇੱਥੋਂ 435 ਕਿਲੋਮੀਟਰ ਦੂਰ ਹੈ। ਇੱਥੇ ਲੋਕਾਂ ਨੇ ਕੁਝ ਸਕਿੰਟਾਂ ਲਈ ਧਰਤੀ ਹਿੱਲਦੀ ਮਹਿਸੂਸ ਕੀਤੀ। ਇਸ ਤੋਂ ਬਾਅਦ ਭੂਚਾਲ ਦੇ ਕਈ ਛੋਟੇ ਝਟਕੇ ਵੀ ਆਏ। ਹਾਲਾਂਕਿ ਅਜੇ ਤੱਕ ਕਿਸੇ ਵੱਡੇ ਨੁਕਸਾਨ ਜਾਂ ਸੱਟ ਦੀ ਕੋਈ ਖਬਰ ਨਹੀਂ ਹੈ।
ਭੂਚਾਲ ਤੋਂ ਬਾਅਦ ਸੁਨਾਮੀ ਦੀ ਚਿਤਾਵਨੀ ਕਰੀਬ ਇਕ ਘੰਟੇ ਤੱਕ ਜਾਰੀ ਰਹੀ। ਇਹ ਚਿਤਾਵਨੀ ਭੂਚਾਲ ਦੇ ਤੁਰੰਤ ਬਾਅਦ ਜਾਰੀ ਕੀਤੀ ਗਈ ਸੀ। ਚੇਤਾਵਨੀ ਕੈਲੀਫੋਰਨੀਆ ਵਿੱਚ ਮੋਂਟੇਰੀ ਬੇ ਦੇ ਤੱਟਾਂ ਤੋਂ ਓਰੇਗਨ ਤੱਕ ਲਗਭਗ 500 ਮੀਲ (805 ਕਿਲੋਮੀਟਰ) ਤੱਟੀ ਖੇਤਰਾਂ ਲਈ ਸੀ। 50 ਲੱਖ ਤੋਂ ਵੱਧ ਲੋਕਾਂ ਨੂੰ ਸੁਨਾਮੀ ਦਾ ਖ਼ਤਰਾ ਸੀ।