ਪੁਲਸ ਵਿਭਾਗ ‘ਚ ਵੱਡਾ ਪ੍ਰਸ਼ਾਸਨਿਕ ਫੇਰਬਦਲ, 15 IPS ਤੇ 62 HPS ਅਧਿਕਾਰੀਆਂ ਦੇ ਤਬਾਦਲੇ

ਸ਼ਿਮਲਾ : ਸੂਬਾ ਸਰਕਾਰ ਨੇ ਪੁਲਸ ਵਿਭਾਗ ਵਿੱਚ ਵੱਡੇ ਪੱਧਰ ‘ਤੇ ਪ੍ਰਸ਼ਾਸਨਿਕ ਫੇਰਬਦਲ ਕੀਤੇ ਹਨ ਅਤੇ ਬੁੱਧਵਾਰ ਨੂੰ ਛੁੱਟੀ ਵਾਲੇ ਦਿਨ 15 ਆਈਪੀਐਸ ਅਤੇ 62 ਐਚਪੀਐਸ ਅਧਿਕਾਰੀਆਂ ਦੇ ਤਬਾਦਲੇ ਦੇ ਹੁਕਮ ਜਾਰੀ ਕੀਤੇ ਹਨ। ਇਸ ਤੋਂ ਇਲਾਵਾ 4 ਆਈਪੀਐਸ ਅਧਿਕਾਰੀਆਂ ਨੂੰ ਵਾਧੂ ਜ਼ਿੰਮੇਵਾਰੀਆਂ ਦਿੱਤੀਆਂ ਗਈਆਂ ਹਨ। ਸਰਕਾਰ ਨੇ 7 ਪੁਲਸ ਜ਼ਿਲ੍ਹਿਆਂ ਕਾਂਗੜਾ, ਕੁੱਲੂ, ਹਮੀਰਪੁਰ, ਕਿਨੌਰ, ਬੱਦੀ, ਚੰਬਾ ਅਤੇ ਨੂਰਪੁਰ ਦੇ ਐਸਪੀ ਬਦਲ ਦਿੱਤੇ ਹਨ। ਇਸ ਤੋਂ ਇਲਾਵਾ 6 ਪੁਲਸ ਅਧਿਕਾਰੀਆਂ ਨੂੰ ਐਸਪੀ ਪੱਧਰ ਦੀਆਂ ਅਸਾਮੀਆਂ ‘ਤੇ ਤਾਇਨਾਤ ਕੀਤਾ ਗਿਆ ਹੈ, ਜਿਨ੍ਹਾਂ ਵਿੱਚ 1 ਆਈਪੀਐਸ ਅਤੇ 6 ਐਚਪੀਐਸ ਅਧਿਕਾਰੀ ਸ਼ਾਮਲ ਹਨ।ਜਾਣਕਾਰੀ ਮੁਤਾਬਕ ਸਰਕਾਰ ਵੱਲੋਂ ਜਿਨ੍ਹਾਂ ਪੁਲਸ ਜ਼ਿਲ੍ਹਿਆਂ ਦੇ ਐਸਪੀ ਬਦਲੇ ਗਏ ਹਨ, ਉਨ੍ਹਾਂ ਵਿੱਚੋਂ ਆਈਪੀਐਸ ਅਧਿਕਾਰੀ ਅਤੇ ਐਸਪੀ ਨੂਰਪੁਰ ਅਸ਼ੋਕ ਰਤਨ ਨੂੰ ਐਸਪੀ ਕਾਂਗੜਾ ਨਿਯੁਕਤ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਪੁਲਸ ਜ਼ਿਲ੍ਹੇ ਵਿੱਚ 6 ਐਚਪੀਐਸ ਅਧਿਕਾਰੀਆਂ ਨੂੰ ਐਸਪੀ ਵਜੋਂ ਤਾਇਨਾਤ ਕੀਤਾ ਗਿਆ ਹੈ। ਇਸ ਵਿੱਚ ਕਮਾਂਡੈਂਟ ਹੋਮ ਗਾਰਡ 9ਵੀਂ ਬਟਾਲੀਅਨ ਧਰਮਸ਼ਾਲਾ ਮਦਨ ਲਾਲ ਨੂੰ ਐਸਪੀ ਕੁੱਲੂ, ਐਸਪੀ ਸਟੇਟ ਵਿਜੀਲੈਂਸ ਧਰਮਸ਼ਾਲਾ ਬਲਬੀਰ ਸਿੰਘ ਨੂੰ ਐਸਪੀ ਹਮੀਰਪੁਰ, ਐਸਪੀ ਲੀਵ ਰਿਜ਼ਰਵ ਹੈੱਡਕੁਆਰਟਰ ਸੁਸ਼ੀਲ ਕੁਮਾਰ ਨੂੰ ਐਸਪੀ ਕਿਨੌਰ, ਐਸਪੀ ਬੱਦੀ ਦੇ ਅਹੁਦੇ ਦੀ ਦੇਖਭਾਲ ਕਰ ਰਹੇ ਵਿਨੋਦ ਕੁਮਾਰ ਨੂੰ ਸਥਾਈ ਤੌਰ ‘ਤੇ ਐਸਪੀ ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਹੈ।