ਬਲਿਆ- ਉੱਤਰ ਪ੍ਰਦੇਸ਼ ਦੇ ਬਲਿਆ ਜ਼ਿਲ੍ਹੇ ਵਿੱਚ ਇੱਕ ਧਾਰਮਿਕ ਆਗੂ ਵਿਰੁੱਧ ਸੰਵਿਧਾਨ ਦੇ ਨਿਰਮਾਤਾ ਬਾਬਾ ਸਾਹਿਬ ਡਾ. ਬੀ.ਆਰ. ਅੰਬੇਡਕਰ ਦੇ ਖਿਲਾਫ਼ ਗਲਤ ਜਾਣਕਾਰੀ ਅਤੇ ਅਪਮਾਨਜਨਕ ਟਿੱਪਣੀਆਂ ਫੈਲਾਉਣ ਦੇ ਦੋਸ਼ ਵਿੱਚ ਮਾਮਲਾ ਦਰਜ ਕੀਤਾ ਗਿਆ ਹੈ। ਇਹ ਮਾਮਲਾ ਬੁੱਧਵਾਰ ਰਾਤ ਨੂੰ ਦਰਜ ਕੀਤਾ ਗਿਆ। ਪੁਲਸ ਅਧਿਕਾਰੀਆਂ ਨੇ ਵੀਰਵਾਰ ਨੂੰ ਇਸ ਕਾਰਵਾਈ ਦੀ ਜਾਣਕਾਰੀ ਦਿੱਤੀ ਹੈ।
ਫੇਸਬੁੱਕ ‘ਤੇ ਕੀਤੀਆਂ ਸਨ ਅਪਮਾਨਜਨਕ ਟਿੱਪਣੀਆਂ
ਜਾਣਕਾਰੀ ਅਨੁਸਾਰ ਜਿਨ੍ਹਾਂ ਵਿਰੁੱਧ ਮਾਮਲਾ ਦਰਜ ਕੀਤਾ ਗਿਆ ਹੈ, ਉਨ੍ਹਾਂ ਦੀ ਪਛਾਣ ਸਵਾਮੀ ਆਨੰਦ ਸਵਰੂਪ ਵਜੋਂ ਹੋਈ ਹੈ, ਜੋ ਸ਼ਾਂਭਵੀ ਪੀਠ ਦੇ ਪੀਠਾਧੀਸ਼ਵਰ ਅਤੇ ਕਾਲੀ ਸੈਨਾ ਦੇ ਸੰਸਥਾਪਕ ਹਨ। ਪੁਲਸ ਅਨੁਸਾਰ ਸਵਾਮੀ ਆਨੰਦ ਸਵਰੂਪ ਨੇ ‘ਫੇਸਬੁੱਕ’ ਪਲੇਟਫਾਰਮ ਦੀ ਵਰਤੋਂ ਕਰਦੇ ਹੋਏ ਅੰਬੇਡਕਰ ਦੇ ਖਿਲਾਫ਼ ਕਈ ਇਤਰਾਜ਼ਯੋਗ, ਗੁੰਮਰਾਹ ਕਰਨ ਵਾਲੀਆਂ ਅਤੇ ਅਪਮਾਨਜਨਕ ਟਿੱਪਣੀਆਂ ਕੀਤੀਆਂ ਸਨ। ਉਨ੍ਹਾਂ ‘ਤੇ ਬਾਬਾ ਸਾਹਿਬ ਦੇ ਖਿਲਾਫ਼ ਅਲੱਗ-ਅਲੱਗ ਸ਼ਬਦਾਂ ਦਾ ਇਸਤੇਮਾਲ ਕਰਕੇ ਅਫਵਾਹ ਫੈਲਾਉਣ ਦਾ ਦੋਸ਼ ਹੈ।
ਜ਼ਿਲ੍ਹਾ ਪੰਚਾਇਤ ਮੈਂਬਰ ਦੇ ਪ੍ਰਤੀਨਿਧੀ ਨੇ ਦਰਜ ਕਰਵਾਈ ਸ਼ਿਕਾਇਤ
ਇਹ ਮਾਮਲਾ ਬਲਿਆ ਜ਼ਿਲ੍ਹੇ ਦੇ ਭੀਮਪੁਰਾ ਥਾਣਾ ਵਿੱਚ ਦਰਜ ਕੀਤਾ ਗਿਆ ਹੈ। ਸ਼ਿਕਾਇਤ ਜ਼ਿਲ੍ਹਾ ਪੰਚਾਇਤ ਦੀ ਮੈਂਬਰ ਧਾਨ ਪਤੀ ਦੇਵੀ ਦੇ ਪ੍ਰਤੀਨਿਧੀ ਅਰੁਣ ਕੁਮਾਰ ਸੰਗਮ ਦੀ ਤਰਫੋਂ ਦਿੱਤੀ ਗਈ ਸੀ। ਪੁਲਸ ਖੇਤਰ ਅਧਿਕਾਰੀ (ਰਸੜਾ) ਆਲੋਕ ਕੁਮਾਰ ਗੁਪਤਾ ਨੇ ਦੱਸਿਆ ਕਿ ਮਾਮਲਾ ਦਰਜ ਕਰ ਲਿਆ ਗਿਆ ਹੈ ਅਤੇ ਜਾਂਚ ਜਾਰੀ ਹੈ।