ਜੈਪੁਰ: ਰਾਜਸਥਾਨ ਦੇ ਖਾਧ ਸੁਰੱਖਿਆ ਵਿਭਾਗ ਨੇ ਜੈਪੁਰ ਵਿੱਚ ਇੱਕ ਅਜਿਹੀ ਸਾਜ਼ਿਸ਼ ਦਾ ਪਰਦਾਫਾਸ਼ ਕੀਤਾ ਹੈ, ਜਿਸ ਨੇ ਲੋਕਾਂ ਦੀ ਸਿਹਤ ਨਾਲ ਖਿਲਵਾੜ ਕਰਨ ਵਾਲਿਆਂ ਦੇ ਰੋਂਗਟੇ ਖੜ੍ਹੇ ਕਰ ਦਿੱਤੇ ਹਨ। ਵਿਭਾਗ ਨੇ ਅਮੂਲ ਬ੍ਰਾਂਡ ਦੇ ਲਗਭਗ 1.5 ਲੱਖ ਕਿਲੋਗ੍ਰਾਮ ਐਕਸਪਾਇਰ ਹੋ ਚੁੱਕੇ ਪੈਕਟਬੰਦ ਖਾਧ ਪਦਾਰਥਾਂ ਨੂੰ ਜ਼ਬਤ ਕਰਕੇ ਨਸ਼ਟ ਕਰ ਦਿੱਤਾ ਹੈ। ਇਨ੍ਹਾਂ ਉਤਪਾਦਾਂ ਦੀ ਐਕਸਪਾਇਰੀ ਡੇਟ ਮਿਟਾ ਕੇ ਉਨ੍ਹਾਂ ਨੂੰ ਨਵੇਂ ਸਿਰੇ ਤੋਂ ਬਾਜ਼ਾਰ ਵਿੱਚ ਵੇਚਣ ਦੀ ਵੱਡੀ ਯੋਜਨਾ ਸੀ।
181 ਹੈਲਪਲਾਈਨ ਨੇ ਖੋਲ੍ਹੀ ਪੋਲ
ਜਾਣਕਾਰੀ ਅਨੁਸਾਰ, ਰਾਜ ਸਰਕਾਰ ਦੀ 181 ਜਨ ਸ਼ਿਕਾਇਤ ਹੈਲਪਲਾਈਨ ‘ਤੇ ਮਿਲੀ ਇੱਕ ਗੁਪਤ ਸੂਚਨਾ ਤੋਂ ਬਾਅਦ ਜੈਪੁਰ-II ਦੇ ਮੁੱਖ ਮੈਡੀਕਲ ਅਤੇ ਸਿਹਤ ਅਧਿਕਾਰੀ (CMHO) ਦੀ ਟੀਮ ਨੇ ਖੋ ਨਾਗਰੀਆਨ ਇਲਾਕੇ ਵਿੱਚ ਸਥਿਤ ਇੱਕ ਗੋਦਾਮ ‘ਤੇ ਛਾਪਾ ਮਾਰਿਆ। ਗੁਆਂਢੀਆਂ ਨੇ ਸ਼ੱਕ ਜਤਾਇਆ ਸੀ ਕਿ ਗੋਦਾਮ ਦੇ ਅੰਦਰ ਸਵੇਰੇ ਜਲਦੀ ਮਜ਼ਦੂਰ ਆਉਂਦੇ ਸਨ ਅਤੇ ਸਾਰਾ ਦਿਨ ਗੇਟ ਅੰਦਰੋਂ ਬੰਦ ਰਹਿੰਦਾ ਸੀ। ਛਾਪੇਮਾਰੀ ਦੌਰਾਨ ਅਧਿਕਾਰੀ ਉਸ ਵੇਲੇ ਹੈਰਾਨ ਰਹਿ ਗਏ ਜਦੋਂ ਉਨ੍ਹਾਂ ਨੂੰ ਉੱਥੇ ਥਿਨਰ, ਐਸੀਟੋਨ ਅਤੇ ਹੋਰ ਕੈਮੀਕਲ ਮਿਲੇ। ਇਨ੍ਹਾਂ ਦੀ ਵਰਤੋਂ ਪੁਰਾਣੀ ਐਕਸਪਾਇਰੀ ਡੇਟ ਨੂੰ ਮਿਟਾਉਣ ਲਈ ਕੀਤੀ ਜਾ ਰਹੀ ਸੀ।