ਲੁਧਿਆਣਾ : ਲੁਧਿਆਣਾ ਬੱਸ ਸਟੈਂਡ ਨੂੰ ਪੰਜਾਬ ਦੇ ਪਹਿਲੇ ਵਿਸ਼ੇਸ਼ ਲੋੜਾਂ ਵਾਲੇ ਵਿਅਕਤੀਆਂ ਲਈ ਅਨੁਕੂਲ ਬੱਸ ਟਰਮੀਨਲ ’ਚ ਬਦਲ ਦਿੱਤਾ ਗਿਆ ਹੈ। ਜ਼ਿਲਾ ਪ੍ਰਸ਼ਾਸਨ ਨੇ ‘ਐਕਟ ਹਿਊਮਨ’ ਐੱਨ. ਜੀ. ਓ. ਦੀ ਸੰਸਥਾਪਕ ਹਰਲੀਨ ਕੌਰ ਦੀ ਅਗਵਾਈ ਅਤੇ ਡਿਪਟੀ ਕਮਿਸ਼ਨਰ ਹਿਮਾਂਸ਼ੂ ਜੈਨ ਦੀ ਸਹਾਇਤਾ ਨਾਲ ‘ਪ੍ਰਾਜੈਕਟ ਉਮੀਦ’ ਤਹਿਤ ਇਸ ਦੀ ਸ਼ੁਰੂਆਤ ਕੀਤੀ ਹੈ।
ਇਸ ਟਰਮੀਨਲ ਨੂੰ ਟੈਕਟਾਈਲ ਫਲੋਰਿੰਗ ਅਤੇ ਥੰਮ੍ਹਾਂ ’ਤੇ ਬ੍ਰੇਲ ਸਾਈਨੇਜ ਨਾਲ ਲੈਸ ਕੀਤਾ ਗਿਆ ਹੈ, ਤਾਂ ਜੋ ਨੇਤਰਹੀਣ ਯਾਤਰੀ ਬਿਨਾਂ ਕਿਸੇ ਦੀ ਮਦਦ ਦੇ ਬੱਸ ਕਾਊਂਟਰ ਅਤੇ ਰੂਟ ਲੱਭ ਸਕਣ। ਇੱਥੇ ਵਿਸ਼ੇਸ਼ ਲੋੜਾਂ ਵਾਲੇ ਵਿਅਕਤੀਆਂ ਲਈ ਅਨੁਕੂਲ ਵਾਸ਼ਰੂਮ ਦੀ ਸਹੂਲਤ ਵੀ ਦਿੱਤੀ ਗਈ ਹੈ। ਮੁੱਖ ਸ਼ਾਸਨ ਅਧਿਕਾਰੀ ਅੰਬਰ ਬੰਦੋਪਾਧਿਆਏ ਅਤੇ ਜ਼ਿਲਾ ਪਰਿਵਰਤਨ ਇੰਟਰਨ ਨਵਪ੍ਰੀਤ ਸਿੱਧੂ ਵੀ ਇਸ ਵੱਕਾਰੀ ਪ੍ਰਾਜੈਕਟ ਦਾ ਹਿੱਸਾ ਸਨ। ਅੰਤਰਰਾਸ਼ਟਰੀ ਮਾਪਦੰਡਾਂ ਤੋਂ ਪ੍ਰਭਾਵਿਤ ਹੋ ਕੇ ਹਰਲੀਨ ਕੌਰ ਨੇ ਭਾਰਤੀ ਕਾਨੂੰਨ ਵਿਚਲੇ ਸਮਾਵੇਸ਼ੀ ਉਪਬੰਧਾਂ ਨੂੰ ਲਾਗੂ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ। ਇਸ ਸਫਲਤਾ ਤੋਂ ਬਾਅਦ ਪ੍ਰਸ਼ਾਸਨ ਅਜਿਹੀਆਂ ਸਹੂਲਤਾਂ ਸਿਵਲ ਹਸਪਤਾਲ ਵਰਗੀਆਂ ਹੋਰ ਜਨਤਕ ਥਾਵਾਂ ’ਤੇ ਵੀ ਸ਼ੁਰੂ ਕਰਨ ਦਾ ਇਰਾਦਾ ਰੱਖਦਾ ਹੈ।